ଭୁବନେଶ୍ୱର : ରାଜ୍ୟରେ ଲଗାଣ ବର୍ଷା ପରେ ନଦୀଗୁଡ଼ିକର ଜଳସ୍ତର ଉପରେ ନଜର ରଖିଛନ୍ତି ସରକାର । ଆଜି ୯ଟା ସୁଦ୍ଧା ମିଳିଥିବା ତଥ୍ୟ ଅନୁଯାୟୀ, ସମଗ୍ର ଓଡ଼ିଶାର ବନ୍ୟା ପରିସ୍ଥିତି ମୋଟାମୋଟି ନିୟନ୍ତ୍ରଣରେ ଥିବାବେଳେ ବୈତରଣୀ ନଦୀ ଅବବାହିକାର କିଛି ଅଞ୍ଚଳରେ ସତର୍କତା ଜାରି କରାଯାଇଛି । ସବୁଠାରୁ ଅଧିକ ଚିନ୍ତାର କାରଣ ପାଲଟିଛି ବୈତରଣୀ ନଦୀ । ଆଖୁଆପଦାରେ ନଦୀର ଜଳସ୍ତର ୨୦.୩୫ ମିଟରରେ ପହଞ୍ଚିଛି, ଯାହା ବିପଦ ସୀମା ୧୮.୩୩ ମିଟର ଠାରୁ ୨ ମିଟରରୁ ଅଧିକ ଉପରେ ରହିଛି । ସେଠାରେ ଜଳସ୍ତର ଏବେ ମଧ୍ୟ ବୃଦ୍ଧି ପାଉଛି । ଆନନ୍ଦପୁରରେ ମଧ୍ୟ ବୈତରଣୀ ୩୯.୪୮ ମିଟରରେ ବିପଦ ସୀମା ଉପରେ ପ୍ରବାହିତ ହେଉଥିଲେ ମଧ୍ୟ ସେଠାରେ ଜଳସ୍ତର ଧୀରେ ଧୀରେ କମିବା ଆରମ୍ଭ କରିଛି । ବୈତରଣୀ ବ୍ୟତୀତ ବୁଢ଼ାବଳଙ୍ଗ ନଦୀର ଏନ୍ ଏଚ୍–୫ ଗୋବିନ୍ଦପୁର ଗେଜ୍ ଷ୍ଟେସନ୍ ରେ ଜଳସ୍ତର ବିପଦ ସୀମା ଅତିକ୍ରମ କରିଛି ।
ସେହିପରି ଜଳକା ନଦୀର ମଠାଣୀ ରୋଡ୍ ବ୍ରିଜରେ ମଧ୍ୟ ଜଳସ୍ତର ବିପଦ ସୀମାଠାରୁ ସାମାନ୍ୟ ଉପରେ ରହିଛି। ତେବେ ଏହି ଦୁଇଟି ସ୍ଥାନରେ ଜଳସ୍ତର ସ୍ଥିର ଥିବାରୁ ତୁରନ୍ତ ବଡ଼ ବିପଦର ଆଶଙ୍କା ନାହିଁ । ଅନ୍ୟପଟେ ମହାନଦୀର ନରାଜ ଏବଂ ବୈତରଣୀର ସ୍ୱାମ୍ପାଟଣା ଗେଜ୍ ଷ୍ଟେସନରେ ଜଳସ୍ତର ବିପଦ ସୀମାର ଖୁବ ନିକଟରେ ରହିଛି । ଏହାଛଡ଼ା ମହାନଦୀର ଉପରମୁଣ୍ଡ, ବ୍ରାହ୍ମଣୀ, କୁଶଭଦ୍ରା, ଦେବୀ, ସୁବର୍ଣ୍ଣରେଖା, ଋଷିକୂଲ୍ୟ ଓ ବଂଶଧାରା ସମେତ ଅଧିକାଂଶ ପ୍ରମୁଖ ନଦୀ ବିପଦ ସୀମାଠାରୁ ବହୁତ ତଳେ ପ୍ରବାହିତ ହେଉଛନ୍ତି । ଫଳରେ ଏହି ନଦୀଗୁଡ଼ିକରୁ ବର୍ତ୍ତମାନ ସୁଦ୍ଧା ବଡ଼ ଧରଣର ବନ୍ୟା ବିପଦର ଆଶଙ୍କା ନାହିଁ । ସାମଗ୍ରିକ ଭାବେ ଦେଖିଲେ, ବର୍ତ୍ତମାନ ବନ୍ୟା ବିପଦ ପ୍ରଧାନତଃ ବୈତରଣୀ ନଦୀ ଅବବାହିକାରେ ସୀମିତ ରହିଛି । ପ୍ରଶାସନ ସତର୍କ ରହିବା ସହ ନଦୀକୂଳବର୍ତ୍ତୀ ଅଞ୍ଚଳର ଲୋକଙ୍କୁ ସଚେତନ ରହିବାକୁ ପରାମର୍ଶ ଦେଇଛି ।
